Eine fausse idaye ed' nou pays

Eine fausse idaye èd' nou pays, par Jean DEREUDRE

Quand in s' trimballe ein France, au louin,

Et qu'in rinconte, mi cha m'arrive,

N'ayant jamais venus dins nos cuins,

Des gins, intriguies, qui vous dichtent :

"Os êtes du Nord, ch'est-y possibe !"

In fesant semblant èd' s'apitoyer :

"Vou vie là in-hieuwe, dot ête terribe !

"Quemint qu'os faites pour résister ?"

Pour ieuwe, nou cuin, ch'est  pont vivabe,

I vinte, i pleut ou i brouaine,

I fait froue à s' reinde malade,

On in trann'roue rin qu'à les intin.ne.

Ch' solel, par ichi, i n' dot jamais luire,

Si on croue ché qui vous prétindent !

Comme is sont jamais vénus vir,

El' temps qu'in a et èl' vie qu'in mène.

Is chavent te pont, ches innochints

Qu'on a mouins èd' pleuve qu'in Normandie,

Et si in a ein peu èd' crachin

Os semmes pont toudis sous ch' parapluie.

On est pont tout à fait à ch' Pôle Nord !

Quand is nous crouites prins dins ches glaches,

Dins nou pays, èl' froui est mouins fort

Equ' dins d'autres contrayes comme l'Alsache.

Qui vienne-te v ir nos belles villes,

Aveuc lus beffroues, lus clochers,

Et nous paysaches fort tranquilles

Intrre l'Avenoue et l' Boulonnais.

Nos bos sont bin pus verdoyants,

Equ' les leurs qui printent fu in étaye

Et nous rivières ch'est pont des torrents

Qui risquent à tout moment èd' déborder.

Chaque païs a ses proublèmes

Dins ch' midi, in s' ramollit

Ichi, dins ch' Nord, in s' démène

On travalle fort, on queur toudis.

Qui vien-te ! Et is devront admette

Equ' dins l' Nord ch'est pont si désolant

Ed' nou cotaye, in veut bin arconnaîte

Equ' par ichi, èch' solel est moins luisant !