Overblog Suivre ce blog
Administration Créer mon blog
12 octobre 2012 5 12 /10 /octobre /2012 07:19

 

L'danger d' traverser ch' bowe, par Georges GOBLET

 

Rosalie, èl' tite file à Mélanie Troués Déints, alle allout sus ses dije èanwes. Es' grand-mère à Rosalie, alle l'invout portoïe in.ne couque et pis in pot d' confitures èd' grugelles blètes à s' soeur Rosemonde qu'alle habitout èch' villache d'à côtèïe. Mais pour yarriver, i fallout, bién intindu, traverser ch' bowe.

     Rosalie alle aurout pu passou-ye pa l' route mais cha l' rallongeout d' mitan. L' mieux d' toute, ch'étout d' passou-ïe par ch' bowe. Mais Rosalie alle avout oubli-ye que l' route d'èch' bowe, si qu'on peut dire, alle étout fort mal in point. Et cha faijout deu-ïes samon-nes qu'i pleuvout sans arrêt. Déjà qu'in temps ordinaire, avec les roy-ïes d' ches reules d' triqueballe, qu' ch'étout pont facile, alors, avec l' pleufe.

     Et des éfants, cha resse des éfants. Rosalie alle étout partie avec ses tits sou-yis qu'alle mettout pour aller à l' messe. L' terre alle déplaquout, alle collout àç ses sou-yis.Rosalie alle pouvout pus avanchi, et patatras... alle két à plat vinte dins in-ne grande flaque d'iauwe, avec chelle belle couque et ch' pot d' confiture.

     Rosalie alle s'o mis à braire. Heureus'mint, in-ne vielle famme alle étout tout près. Alle a rél'vé-ïe nou Rosalie in l' rassrant, in l'apochinant et pis, in vo-yant l' dallache, alle l'a conduit à s' mason.

     Lo, alle a netto-yi ses man-ïes, s' figure, ses habits. Alle l'a récauffé-ïe, netto-yi sin pot d' confiture. L' couque alle étout foutue. Alle a donné-ïe pour l' rimplachi in gros gatiauwe d' pain d'épices qu'alle vénout jusse d'intamou-ïe. A pis, alle a conduit Rosalie par l' man-ïe jusqu'àmon d'ès' grand tante.

     Alle li a dit r'vouère in li dijant qu'alle s'appelout Philomène. Rosalie, alle n'arvénout pont. In.ne vielle famme qu'a n' connaichout même pont.... si bon-ne...

     D' pis ch' temps-lo, ch' bowe, ch'est devenu l' bowe à Philomène, èl' route, ch'est l' route à Philomène,....

 

 

 

Repost 0
Published by Harchelles - dans Textes Georges Goblet
commenter cet article

Présentation

  • : Le blog de Harchelles
  • : Blog consacré au patois (picard) de la région Nord Pas de Calais, et à l'association Les Harchelles
  • Contact

Recherche

Liens